سناء

عشت وشفت ما أحلى أيّام الهنا
قديش فيها كان لعب وولدنا
وحياتي يا بُنيّه إلك مرهنا
تا زيل العلى راسك من جهد وعنا
وشيل آخر حرف من إسمك سناء
وتبقي في قلبي كل أيّام السنه

نادين

أنا اللّي فـْتَحتلـِّك بالأشعار نادي
وبقدومك غرّد حمام الدّوح شـــادي
ورح شيل آخر حرف من إسمك نادين
وبكلمة بـْحبـِّك رح إصرخ ونادي

صفاء

ما انمحى رسمك من خيالي ومَ اختفى
كل دقيقه إجا وعلى راسي لــفى
رح شيل آخر حرف من إسمك صفاء
وإيّامـنا مع بعض تا تبقى صفــا

عطاف

حبّك عَ قلبي هاج بقـــوّه وسطا
من بعــد ما اتخبـّى في الفكرولطى
رح شيل آخر حرف من إسمك عطاف
وقلـّك هيدا الحب اللّي من ألله انعطا

أحلام

بعيني بشوفك زي جبالنا وأعلى
وزيِّ الذهب ومن الذهب أغلى
رح شيل آخر حرف من إسمك أحلام
تا رب ِّ الكون مَ يلاقي متلك أحلى

سيرين

يا حلوي الـْسكنتي عندي بهالدّيري
وليفك أنا عَ الأرض ومافي غيري
رح شيل آخر حرف من إسمك سيرين
تا قلّك إمشي حدّي يا حلوي وسيري

إعتدال

شفتك عَ وجّ الصبح مع قطرالنّدى
وكان أوّل غــرام من صوبك بدا
رح شيل آخر حرف من إسم اعتدال
تا ما يقولو محمد على قلبا اعتدى

يافة النّاصره