بعد الصعب والهمّ يا اللي انزاح
ما كان فيه الضو معتّم سراجُه
رِجع الهنا والنور وجهُ لاح
وطلّ الورد فرحان عاسياجُه

**

ومالت غصونُه تشابك الأغصان
سِكرَت بخمر الحُب طربانه
وفتّح عيونه الورد هالنعسان
بقيت بأمر الحُب سهرانه

**

احمرّت خدودُه الدم بدو يسيل
القُبلات مرسومه على شفافه
كل ما خصوره بالهوى بتميل
بتمنى قبلة خد مين شافُه

**

سطرت رسايل حب عاوراقه
تيمرُق نسيم ويحملها عجناحُه
بتحكي آهات القلب وأشواقه
بلكي النسيم بيلطّف جراحُه

**

ويرجع يعيد الشوق لاصحابه
بهمسات بيحكيها على وروده
والرد يبقى جاي من احبابه
لما النسيم يقبل خدوده

**

خلّيك مثل الورد بتضحك وفرحان
اترك همومك برّه مرمية
ولا يفوت عليك اليوم وانت زعلان
وتبقى النفس بالذل مسقيّه

(المكر)