قاعد الصبح على البرندة كالعادة قدامي غلاية القهوة ،واكم زردة من كعكات العيد وغريب بعد اخوي ابو جمال ما اتصل ،ولعت سيكارة وبعدني عم بشرب اول شفطة من فنجاني والا قامت الغاغة والصياح تحت في الشارع والظاهر في بيت ابو فواز، مع مرقة ابو كمال البعناوي، شو السيرة يا ابوكمال؟ سألته فأجابني والله ماني عارف الظاهر في شباب غرب عن الحارة وعم بتصايحوا مع اولاد جارنا ابو فواز .قللي هياني بشوف شو السيرة وباجي لعندك.
ما اركنت على حكي ابو كمال ولعب الفار بعبي، وعلى قد همتي لبست باجري حيشا السامعين والقارئين ولحقت ابو كمال ويا ريتني ما لحقتوا ولا عرفت شو لحكاي ،وهاي الحكاي يا سادة يا كرام  كاين قبل جمعة ابن جارنا ابو فواز بحيفا وشايف واحد من هدول الشباب الكوماندواللي هاجمين على دارو اليوم شايفو مع صاحبته او زميلته او مش عارف بالزبط مين، شايفهن على – كاف حتسياه- وعلى رايو كاين فواز جاقرو بعيونو الام سكستين وعيون فواز جراحه مش حيالله عيون ، والمصيبة انو فواز كاين مزلوطها ومتبسم .كيف يجقرو ويتبسم ولو كان الامر بس جقرا ما كان اهون من هيك اما جقرا وبسمة هالاشي كثير والامر لا يحتمل.
مشي ابن ابو فواز وروح على بيته، ولكن الاخ المجقورما فوتها ظل يتقصى ويتحقق من نمرة السيارة ومشغل حوكير برطي – محقق شخصي – ودافعلو مصاري حتى اخيرا كشف المستور ومرتكب الجريمة النكراء وجاييلو يحاسيل حشبون "يصفي حساب" وجايب معاه شلة الانس  اصحابو لانو عارف انو فواز وحداني ومقطوع من شجرة وما الو عزوة ومن الممكن يصفي حسابو معاه.
يا اخوان الله لا يفرجيكوا هالمناظر،اللي حامل شرشيرت" جنزير" بيجر سيارة واللي معاه عصاية مخروطة وملونة، عصاة بيسبول قالولي اسمها اذا مش غلطان. واللي معاه فرد غاز مدميع يا عيني، قال لليش هالفرد قال للهغناة عتسميت- يعني للي ما بيعرف شو معناها للدفاع الشخصي . يعني ولا كانو وزير، ويا سيدي حتى رئيس دولة عربية  ما بعملها. يا عمي شخصية مهمة كبيرة وخايف على حالو مهي عيون الناس فارغة وعم يستنوه عالدعسة حتى يمسكوه لوحده ويوكل علقة مليحة بس مهو الصحيح الصحيح، لانو عارف حالو شو مساوي وشو جاي على هالحارة يساوي ،وشو يمكن يصير معه.
اما عن مناظرهم او مناظرهن يا عيني فلا تسأل على هالمناظر حالقين عالصفر واللي عامل شعرو جدولة فكرتو صبية لاول وهلة بس مش معقول، صبية مربية دقن مش معقول ، واللي عامل شعرو كوتسيم يعني شوك باللغة العربيه الداثرة للاسف الشديد  ومجلجلو يعني كابب عليه قدر نصف سطل جل ، واللي داقق تاتو-وشم- برسومات شيطانية لفت نظري واحد فكرت انو ابليس باصق بوجهه،  مهو هيك كانو اهلنا يقولولنا عن  اللي يسقط  شعر حاجبه،ولكو يا عمي بتصدقو،  بلا حواجب فوق عيونه، حالقها بالموس قال هاي موضة....وواحد بنطالونه ساحل لنص..... وفاتح شبابيك "ممزق" ظننت ان  احدا قد اعتدى عليه، او مزق له ملابسه ....لا يا عمي ما حدا قرب منه ولا دقروهاي كمان موضة فان  ثمن البنطلون المشلخ بكثير اغلى من البنطلون السليم اللي مش مشلخ انتي شو بيفهمك بالموضة ...لسان حال من تحاول ان تستفسر منه ....الحصول ...اشي يعرف واشي لا يعرف اصابني دوار .... ومش مفكر حالي الا وكأني في احدى حارات الاجرام في مدينة غريبة الاطوار والسكان.
فرقنا بين الشباب وتكاثروا اهل الحارة وما هي الا لحظات وما بقي حدا منهن لانو ابو كمال كان حمش بالرغم من انو تجاوز الخمسين مثلي الا انو قشط واحد عصاتو وعحندو هواي عمت ظوو وعينك ما تشوف الا النور،  وهيك بلش الضرب حامي ، فما كان منهم الا العمل بالقول القائل  ثلثين المراجل هزيمة، ولحظات مرت وكأنك في شيكاغو فرك عجال سيارات وهاتك يا هريبة لا ظل كوماندو ولا غاز مدميع ولا شرشيرت ولا عصاية الستين عصاية البيسبول .
عرفهن كلهن ابن ابو فواز وراح سلم اساميهن للبوليس. ولو عرفنا ساعتها لكنا قد منعنا فواز من تقديم الشكوى ،لان الشرطة عم تستنى فتح تيكيم واليوم يا عمي اللي بدو يشتغل في  حتى في مصنع يا عمي بدو تعوداة يوشر"شهادة حسن سلوك" واذا كان عندو تيك بليلي"ملف جنائي" فسوف لن يحصل عليها ولو شاف حلمة ذانو، وللاسف بيلحق اصحابو. عالتنقيط شهر العسل يا زين وبيظل ينقط حتى يشفق عليه واحد ويركبلو جلده وما يعود ينقط اي ان يعمل لدى صاحب عمل مستقل لا يطلب منه شهادة حسن سلوك من هنا نقولها دائما ان الشكوى لدى الشرطة لا تنصف المظلوم او تعطي حقا لمن له الحق بل من الممكن ان الشكوى لدى الشرطة ان تؤدي الى تفاقم الوضع وبدل التهدئة تشتعل الامور وتزداد حدة،.....يعني مش حرام ولك يا عمي تشتغل الشهر كله وبالتالي تدفع شقاك غرامات او تقضي مدة  في السجن من ايام عمرك، بدل ان تلتفت لعملك ومستقبلك اي ما احنا شايفين العربي ويا حرام على عيشتو ،الله يقطعوا ويقطع عيشتو، الله والعبد عليه بيركض بيركض والرغيف بيركض قدامه مش لاحقو.
رجعنا للبيت والا ابو جمال فايت هه شو السيرة وين كاين. حكيتللو الحكاي ،وما بدر منه الا الضحك شو يا ابو جمال ضحكنا معاك،قاللي: اسا وانا فايت آخذ الدواء الشهري من الصيدلية، والا بنت في سيارتها قاعدة عم تحكي لحالها، لا معها تلفون ولا حدا في السيارة.فكرت بالاول بتحكي معي، ما قربت من السيارة مرورا للصيدلية، بدي اسالها اذا كانت عم تحكي معي ،او بدها تسألني عن الصيدلية،  فجأة علا صوتها وصارت تصرخ ،طلع الصيدلي....حلفتلو يمين اني لا حكيتها ولا قربت منها. بنت مجنونة، بتحكي لحالها في السيارة، وبتأشر بايديها وما معها حدا....يا سيدي، ضحك الصيدلي وقال لي: يا خوي ابو جمال هاي عم تحكي بالبلو توث ،شو يعني البلوتوث سألتو قاللي هاي اوزنياه بحطوها في الاذن بتتوصل بدون سلك لجهاز التلفون الخلوي البنت ما كانت تحكي معاك، بتحكي مع صاحبتها اللي تأخرت تتيجي للسيارة الله يسهل على العباد قول يا باسط يا ابو جمال.
اخذت دواي خيا واجيت اهدي اعصابي عندك على فنجان قهوه.
مش عارف لوين وصلنا ولوين بعد بدنا نوصل؟؟
كل البلاد هيك؟
كلها يا عمي هيك وازود من هيك صدق في بلاد الوضع اخطر من عندنا بكثير.ولمين تحكي ومين يصلح او يسعى للتصليح يرحم ايام لبسو اهلنا الدماي على البتتين بعد ان تتسخ تقلب وتلبس على الوجه الآخر ومن غسل ثوبه بقي في الفراش عريان حتى يجف الثوب ومن لقي مركوب لرجله –حذاء- فقد نال الكثير الكثير في حياته اخجلو استحوا يا........ والا ،، خربانة خربانة.
نجينا يا الله من المخبا في الغيب،الله يرأف بعباده ويصلح الوضع، كل واحد يدير باله على تربية اولاده  ويا ريته يستطيع ذلك، لانك قلت خربانة خربانة
وشو بدنا بهالسيرة يا خوي،هاتي جددي الغلاي يا ام جريس بس بلا سكر ما احنا مندبق من كثر السكر والسكري.
وددت لو انني كنت في حلم، ولم تكن تلك صورة حقيقية، ولكن للاسف كانت من واقعنا.
هل لغتنا العربية اصبحت متآكلة لهذا الحد ؟ هل قيمنا العربية الاصيلة تآكلت وتقلصت لهذ ا الحد؟؟؟؟
لوين يا بشر.... لمين تحكي ولمين تشكي ومن يسمع استغاثتك ....الشكوى لغير الله مذلة

وصباحكو ندي، الله يصبحكوا بس بالخير

(سخنين)