بَعرفِكْ منيح..
يمكن أكثر من ما بتعرفي حالك
يا مضَّيعه يمينك من شمالك
من غِّيرتِك عم تقهري خيالك
وشووووو...
شو شايفه حالك
حتى على اللي خلفوكي..
شايفه حالك

بعرفك منيح..
من شعر راسِك
لطرف شروالك
شو هم.. مين بيكونوا عمومتك
ومين بيطلعوا خوالك

بعرفك منيح..
وبعرف شو اندرز شامات ع خصرك..
وشو كرج لولو ع خلخالك

بعرفك منيح..
يمكن أكثر من ما بتعرفي حالك..
عشتقك..
وكان قصدي تعشقي حالك
وتعرفي شو الك..
وشو مخبالك

شربت من ملح البحر
كاسات كرمالك
رتبت نجمات القمر
حبات ع شَعْرِك
ومشيت حَّدك
ع لحن موالك
حملت هَّمك
حملت غَّمك
حملت سِّرِك.. وصرت مرسالك
كل يوم ع درب الهوى
عمَّال عتالك

بعرفك منيح..
من حيالَّه كلمة بتزعلي
وبتقطعي حبالك
يسترك الله.. لتُوقَعي بِشَّر أعمالك

من هلئ ورايّح
اتطمني.. ريحي بالك
ما عاد بدي ازعجك
ما عاد بدي إسألك..
وإتطمن ع أحوالك
من بعد هالمره..
ما عاد اصفالك

رُّوحي.. من كل قلبي مسامحِك
عيشي ع فيالك
لا بد ما الايام تثبت لك
وتعرفي بعدين.. شو مخبالك